Representantes das 38 cátedras da empresa familiar en España, que conforman a Rede de Cátedras de Empresa Familiar, reuníronse hoxe en Toledo para avanzar nas liñas de traballo futuras da empresa familiar. No encontro, ao que asistiron Berta Rivera e Elena Rivo, directora e coordinadora das cátedras de empresa familiar da Universidade da Coruña e a Universidade de Vigo, respectivamente, presentouse un avance do estudo A Empresa Familiar en España (2017), elaborado polo Instituto da Empresa Familiar (IEF).
A reunión da Rede de Cátedras coincide coa celebración do XX Congreso Nacional da Empresa Familiar, que organiza cada ano o IEF, coa asistencia de todas as asociacións territoriais da empresa familiar, entre elas, a Asociación Galega da Empresa Familiar (Agef).
A Rede de Cátedras de Empresa Familiar, a maior do mundo nesta disciplina, ten por obxectivo transmitir os valores da empresa familiar á sociedade española a través das universidades, co traballo de 200 profesores universitarios e a formación de 2.000 alumnos ao ano en toda España.