Cátedra de Empresa Familiar da Universidade da Coruña

A Cátedra da Empresa Familiar da Universidade da Coruña naceu en 2005 mediante un convenio de colaboración entre a universidade e o Instituto de Empresa Familiar, co patrocinio da antiga Caixanova, Inditex e a Asociación Galega da Empresa Familiar. Este convenio recoñecía a especial significación e a importancia estratéxica da empresa familiar para a economía e a sociedade do noso país, e de maneira particular, de Galicia. A cátedra foi impulsada coa finalidade de promover a docencia, a investigación e a transferencia de coñecemento respecto ás características diferenciais das empresas familiares e as distintas problemáticas que afectan á súa xestión e crecemento.

A Asociación Galega da Empresa Familiar, o Instituto de Empresa Familiar e Industria de Diseño Textil S.A., Inditex, asinaron no ano 2019 un convenio coa Universidade de A Coruña para renovar por catro anos a Cátedra de Empresa Familiar, ata 2023.

A docencia na Cátedra da Empresa Familiar da Universidade da Coruña materialízase na impartición de dúas asignaturas oficiais de grao e máster –Xestión da Empresa Familiar e Economía e Xestión da Empresa Familiar–, ademais do desenvolvemento de actividades complementarias de formación. A cátedra leva tamén a cabo a organización de xornadas, seminarios, cursos e conferencias nas súas distintas facultades que contan coa participación de representantes de diversas institucións, empresarios e expertos no eido da empresa familiar.

No campo investigador, a Cátedra de Empresa Familiar da Universidade da Coruña promove o desenvolvemento de estudos e investigacións sobre a realidade das empresas familiares, a súa importancia e a súa evolución, tanto desde a orientación profesional como puramente académica.