Carlota López Pardo, adxunta á presidencia do grupo Aresa e presidenta do Forum de Xóvenes da Asociación Galega da Empresa Familiar (Agef), impartiu este martes unha conferencia na Facultade de Ciencias Empresariais e Turismo da Universidade de Vigo dentro do marco de actividades da cátedra de empresa familiar, na que puxo en valor a estratexia de diversificación da compañía agroalimentaria lucense.
Aresa é un exemplo de compañía familiar galega diversificada, cunha oferta de subministros agrícolas, sementes, fitosanitarios, pensos para mascotas e gandería e plástico de ensilaxe. Ademais, a compañía conta con Todocampo e Cecoagro, con útiles de agricultura, gandería, xardinaría e mascotas de venda directa.